Nan yon pwosesis elektoral, elektè a pa sèlman gen dwa mete bilten li nan bwat. Li gen dwa jwenn enfòmasyon, fè chwa li lib epi pwoteje sekrè vòt li. An menm tan, li gen responsablite pou respekte règ yo, libète lòt sitwayen yo epi kontribye nan yon eleksyon ki fèt san vyolans.
Nan nenpòt pwosesis elektoral, elektè a jwe yon wòl santral. Vòt li pèmèt li patisipe nan chwa moun ki pral reprezante l epi pran desizyon nan non kominote a.
Pami prensipal dwa elektè a genyen, gen dwa pou vote lib, san presyon, menas oswa entimidasyon. Li gen dwa tou pou vòt li rete sekrè, pou jwenn enfòmasyon sou pwosesis elektoral la epi pou itilize mekanis legal ki disponib yo lè li estime gen iregilarite.
Men, dwa sa yo mache ansanm ak kèk devwa. Elektè a dwe chèche enfòmasyon serye sou kandida yo ak pwogram yo, respekte règ ki etabli nan biwo vòt yo epi respekte chwa lòt sitwayen yo.
Nan kontèks kote rezo sosyal yo pran yon plas enpòtan nan sikilasyon enfòmasyon, verifye nouvèl anvan pataje li vin tounen yon lòt responsablite enpòtan. Rimè ak fo enfòmasyon kapab ogmante tansyon epi twonpe elektè yo.
Responsablite elektè a pa fini lè li fin vote. Apre eleksyon an, li kapab kontinye suiv aksyon moun ki eli yo, mande transparans epi patisipe nan lavi piblik la atravè mwayen legal ak demokratik yo.
Konprann dwa li, respekte devwa li epi fè chwa li lib : se konsa elektè a kapab jwe tout wòl li nan lavi demokratik la.