Bandi ak zam, asasine Eric Jean Baptiste, sekretè jeneral pati politik RDNP a vandredi 28 oktòb 2022 a nan laboul. Bandi yo krible machin lidè a ak bal pandan li ta pral rantre lakay li. Yo te kouri lopital ak li malerezman li rann dènye souf li. Yon ajan sekirite ki te akonpaye Eric mouri tou.
Daprè sa jij de pè Clément Noël ki fè konsta a rapòte; machin viktim nan resevwa 14 bal, 5.56. Eric resevwa yon sèl bal nan senti epi Peterson Vernius resevwa 3 bal. Asasen yo pote ale zam ki te nan men viktim yo plis pòtfèy Erik.
Selon sa pwòch Eric Jean Baptiste fè konnen, machin li te ladann nan te blennde, nan nivo 4. Malgre blendaj la, sa pat anpeche katouch bandi yo pèsel, paske sete zam gwo kalib.
Nap raple, responsab RDNP a ki se tou propriyetè bòlèt pè letènèl loto te sibi yon atak deja an Oktòb 2018 nan zòn Kafou fèy. Li te pran yon bal nan bra. Eric mouri a laj 52 lane.
Machin ensekirite a kontinye ap fè wout li nan peyi Ayiti pandan otorite yo menm rale zòrye yo ap dòmi.