Militè yo, atravè Kapitèn Ibrahim Traoré, entèdi RFI bay nouvèl nan Boukina Faso
Radyo Frans Entènasyonal (RFI) jwenn entèdiksyon san limit epi imedyat, pou li pa kontinye fonksyone nan peyi Boukina Faso apati 3 desanm 2022 a. Se jent militè k ap dirije peyi a ki pran desizyon an, paske yo estime radyo a bay manti epi li te pase mesaj yon teyoris ki t ap fè moun pè.
Radyo Frans Entènasyonal nan Boukina Faso pa sispann entegre sèn politik peyi a byen fon, selon dirijan Boukinabè yo. Depi aprè 2 koudeta ki fèt nan peyi a nan 8 mwa, ki mete sou pouvwa a Kapitèn Ibrahim Traoré nan dat 30 sept 2022 a, RFI pa sispann bay manti sou peyi a, nan objektif pou aneyanti konsiderableman tranzisyon dènye ki fèt la, ki pa nan enterè peyi Lafrans.
Pou ale pi lwen, Radyo Frans Entènasyonal nan peyi Thomas Sankara a rive pèmèt vwa yon gwoup teyoris pase nan kad yon emisyon, kote gang sa yo t ap bay popilasyon an anpil presyon, kòm kwa yo pral mete peyi a tèt anba. Yon konpòtman gouvènman tranzisyon anplas la kondane epi sanksyone.
N ap note, dirijan Malyen yo bò kote pa yo tou, pa wè byen relasyon bilateral ki tabli ant peyi Mali ak Lafrans dènye tan sa yo, yon ansanm dezakò ki pouse pèp la toujou mande pou peyi Lafrans lage pye l definitivman nan Mali, e pèmèt yo pran dwa otodetèminasyon yo. Se konsa, nan dat 31 janvye 2022 ki sot pase la a, jent militè k ap dirije peyi Mali a te deside ekspilse anbasadè Lafrans lan nan peyi a.
Sérondier LOUISIA, Centre à la UNE