Lapolis Nasyonal d’Ayiti anonse yo arete 3 bandi baz Gran Grif Savien ak yon bandi ki soti nan baz Vitelhomme nan ba latibonit 2 Janvye 2023 a.
Senel Dorisca ak frè l Lissage Dorisca jwenn arestasyon yo nan vil Senmak aprè yon tantativ kidnapin n popilasyon an te devye nan zòn “Jean Denis” sou yon machin ki t ap pran direksyon Sen Michèl selon sa sèvis kominikasyon PNH la rapòte.
Florestal Riguenson, alias izi, jwenn arestasyon l nan Ti Rivyè Latibonit ak yon zam ilegal aprè sèvis ransèyman nan Senmak te fin idantifye bandi a kòm yon manm baz Gran Grif ki nan Savien.
Carly Dousse, jwenn arestasyon l nan vil Senmak apre sèvis ransèyman Depatmantal Latibonit ki deplwaye Senmak te idantifye l kòm manm gang Vitelhomme k ap pwofite ransone moun pandan pasaj li nan ba latibonit pou peryòd fèt la.
4 bandi sa yo deja ap reponn kesyon SDPJ nan Senmak.
Direksyon Depatmantal Polis la pwofite okazyon sa pou swete tout popilasyon Latibonit la yon lane tèt ansanm, lapè, respè vi ak byen moun.