Polis nasyonal Ayiti prezante mèkredi 4 Janvye 2023 a, 3 moun yo di ki ta fè pati gang k ap teworize popilasyon nan Kanaran Komin Kwadèboukè. PNH presize arestasyon sila fèt vandredi 30 Desanm 2022 a, nan Vil Ench Depatman Sant Ayiti. Appolon Franky, Wesly Jean-Baptiste, Simon Daniel se 3 jèn gason sila yo ki anba kòd.
Lapolis fè konnen Appolon Franky ki genyen 29 lane se moun Ench ki ap viv Kanaran, li se manb aktif gang k ap opere nan zòn Kanaran. Wesly Jean-Baptiste li menm genyen 26 lane, li fèt Sendomeng etou li se manb aktif yon gang nan Kanaran ki se alye 400 mawozo ki enplike nan kidnaping ak touye moun. Selon PNH anketè jwenn kèk imaj sou telefòn li ki ta bay endis li patisipe nan touye Jennifer Pierre nan Pòtoprens li te genyen relasyon amourèz ak li. E Simon Daniel limenm ki genyen 25 lane se moun Douya, li ta patisipe nan asasinen yon polisye ki rele Patrick Jean Louis. PNH di Daniel li menm tou se manb aktif gang Kanaran kise alye 400 mawozo.
Pou moman sa tout 3 mesye yo nan gadavi selon PNH pou yo rete tann swivi lajistis.