Yon avyon militè kanadyen (CP-130), ki gen rada ladan l ( sa ki pèmèt li vole wo epi katografye divès kote fyèf gang yo loje), siyone kèk zòn an Ayiti samdi 04 fevriye 2023 a. Sébastien Carrière ki se Anbasadè peyi Kanada an Ayiti, fè konnen se yon pa anplis nan bourad Kanada ap bay pou rezoud kriz Ayiti a.

Anbasadè Sébastien ki t ap pale de patwouy la fè konnen « CP-140 Aurora » a se yon avyon patwouy a lon tèm, ki gen yon seri vòl enpresyonan ak yon seri detèktè avanse ki konbine pou fè li yon platfòm siveyans trè efikas.

Li kontinye pou di siveyans sa a se yon lòt etap nan repons Kanada, pou mete yon fren nan kriz Ayisyèn nan, ki chita sou kat pwen byen defini: dyalòg politik enklizif, sanksyon, èd imanitè ak asistans sekirite.

Anbasadè a fini pou fè konnen pou sekirite operasyon an ak manm ekip Kanada a ki reprezante pa « ARC_RCAF », ki deja deplwaye, li p ap fè plis kòmantè sou misyon sa a, ki fèt an kolaborasyon e ak akò Gouvènman Ayiti a.

Poutan, swa dizan menm gouvènman peyi Ayiti sa a anbasadè a di k ap travay an kolaborasyon ak li a, pa t fè okonn anons pou aktivite a, pi mal, aprè pase 7 tè òlòj depi misyon sila kòmanse nan espas Ayiti a, ni Premye Minis peyi a, mouche Ariel Henry, ni Primati, ni Ministè Kominikasyon, youn pa di anyen sou avyon sila ki t ap opere nan espas Ayiti.

Rive anvyon sila mete anpil kontriksyon ant popilasyon Ayisyèn nan. Pou yon premye gwoup, se yon mank respè pou souverènte Ayiti ak tout pèp Ayisyen an, puiske sitwayen yo pa konn anyen de avyon sila yo jis wè k ap siyale nan espas la. Pou yon lòt gwoup, se yon trè bon pa bò kote Kanada, ki moutre li vle ede Ayiti tout bon vre. Gen yon dènye gwoup, kòm dabitid, ki pran 2 je y ap gade, san kòmante pou osnon kont.

An pasan, divès Sitwayen-Ayisyen ki sanse pa manje manje bliye, pwofite de menm moman sila pou mande anbasadè Kanadyen an an Ayiti, Sébastien Carrière, finalman, jis kilè rès blende yo ap antre an Ayiti, pou vini ede PNH la goumen ak bandi san fwa ni lwa yo k ap fin teyorize popilasyon Ayisyèn nan, kote pèsòn pa epaye ?

Sérondier LOUISIA, Centre à la UNE.

By Centre à la UNE

Centre à la UNE se yon ajans an liy ki bay nouvèl nan tout rakwen peyi Dayiti ak rès Mond lan. Nouvèl nou yo kredib e verifye ak yon rezo jèn jounalis profesyonèl e konpetan. Ou ka kontakte nou nan: journalcentrealaune@gmail.com e +549 351 262 7841