Prezidant peyi Ondiras la, Xiomara Castro Zelaya, fè konnen vandredi 17 mas 2023 a, gouvènman l ap dirije a deside devlope relasyon diplomatik ak peyi Lachin, pandan li vire do bay Taywann. Yon desizyon peyi Lèzetazini pa twò byen wè, lakòz enterè yo pa nan Lachin.
Lachin avèk Taywann se 2 espas ki se vwazen youn ak lòt, ou ta di se Ayiti ak Dominikani. Men, pa rapò ak pwoblèm jewopolitik, yo pral divize, sa ki vin bay 2 eta diferan. E pou anpil moun, divizyon sila se zèv peyi Lèzetazini, paske Lachin se konkiran imedya yo nan nivo ekonomik ak lòt sektè.
Se nan lane 2000 yo, sitwayen yo nan Taiwan te deside eli Chen Shui-Bian kòm prezidan peyi a, ki genyen yon konstitisyon, drapo, anblèm, vis-prezidan, kapital, lajan, lang… Yon desizyon ki te bay Lachin anpil enkyetid. Sipòte Chen Shui yo ak pati li a ki se Pati Demokratik Pwogresis (DPP), te ouvètman sipòte endepandans Taywann.
Nan yon premye tan, Lèzetazini te aksepte politik « yon sèl Lachin » nan, kote yo te rekonèt yon sèl gouvènman ki se Peken (Lachin+Taymann). Men, menm Etazini an pral deklare y ap entèvni militèman si Lachin ta oze anvayi Taywann. Pi lwen, nan mwa me 2022, Prezidan Joe Biden te reponn wi, lè yo te poze l kesyon èske yon jou Etazini ka defann Taiwan militèman. Poutan, Taiwan se sèlman kliyan zam Etazini, yo pa gen okenn akò ki lye yo.
N ap note, se pa sèlman peyi Ondiras ki deside koupe relasyon diplomatik li ak Taywann, nan mwa desanm 2021, Nikaragwa te anonse li kraze relasyon diplomatik li yo ak Taiwan. Yon separasyon rejim Taipei a te fè konnen li regrèt anpil, paske yon patnè fidèl te kite l. Pi ta, peyi Nijè, Lafrik di sid, Lesotho, Masedwan… Pral suiv Nikaragwa.
Fòk nou sinyale, Òganizasyon Nasyonzini (ONU) pa ko janm rekonèt Taywann kòm yon peyi, ni li pa manm ONU tou. Men paralèlman, genyen yon lis ki gen pi piti pase 20 eta (pou enterè yo) ki dakò, yo rekonèt e aksepte Taywann se yon peyi, pami yo nou jwenn nan tèt lis la Ayiti, aprè sa ou jwenn Vatikan, Beliz, Gwatemala, Paragwe, Nikaragwa, Sent-Lucia…