Ansyen depite kominn Kafou a, (Ayiti) Élie Blaise, mouri anndan lakay li. Jij depè Jean Jules Rica, ki te vin fè konsta legal yo, lendi 25 desanm 2023 a, fè konnen yo vin jwenn ansyen palmantè a nan rezidans li ki nan « Mahotière 75 ».
Jij la di Élie Blaise resevwa yon bal nan pwatrin, epi kadav li te kòmanse ap degaje movèz odè. Nan entèvansyon li fè nan mikwo jounalis, jij Rica fè konnen, endividi yo ki fè zak la, kase kay la avan yo ale. Majistra a di, ansyen depite a t ap viv pou kont li nan kay la.
Blaise se te ansyen alye PHTK a, ki te syeje nan karant nevyèm (49èm) lejislati a,li te eli anba banyè MAS pou sikonskripsyon Kafou. Li te pase nan tèt OAVCT kòm direktè anplis, li se fondatè yon gwo lekòl nan Kafou.
Anpil rèl ak dezolasyon nan mitan fanmi ak patizan ansyen DG OAVTC a. N ap tounen pou plis detay.