Pandan vizit li an Ayiti, samdi 21 septanm lan, prezidan peyi Kenya a, William Ruto, anonse 2 lòt kontenjan polisye kenyan pou vin ranfòse misyon miltinasyonal la an Ayiti.
600 nouvo polisye pou vin ede polis nasyonal Ayiti nan efò l ap fè pou l kwape gang nan peyi a.
Polisye sa yo ap vini an 2 tan. 300 ap debake an oktòb, tandiske lòt 300 an ap rive nan mwa novanm lan, selon sa prezidan kenyan an fè konnen.
William Ruto ki te ateri sou pis ayewopò Toussain Louverture a, samdi a, eksprime kontantman l pou pwogrè li di fòs miltinasyonal la fè pou sekrize peyi a.
Dirijan Kenyan fè remake gen plis sekirite kounya nan zòn Ayewopò a ak zòn pale nasyonal la pa egzanp, toutpandan l pwofite felisite konpatriyòt li yo pou travay yo ap fè an Ayiti.
Pi lwen, William Ruto fè konnen fòs miltinasyonal la bezwen resous nesesè ak ekipman kòrèk pou kontinye sekirize peyi a.
Prezidan Ruto di tou li rete trè ouvè pou tout evantyèl transfòmasyon MSSMHaiti, an yon fòs Misyon lapè nasyon Zini.