Mondyal 2026. Eliminatwa Concacaf. Seleksyon ayisyèn foutbòl la fè yon defèt (0-3) fas ak Ondiras, lendi 13 oktòb 2025 la, nan kad katriyèm jounen dènye faz eliminatwa Koup dimonn yo. Aprè kat (4) jounen, Ayiti genyen 5 pwen, li plase an 3è pozisyon aprè Ondiras ak Kostarika ki yo chak respektivman 1è ak 2è nan klasman nan gwoup C a.
Ayiti rete pou li jwe de (2) match desizif kont Kosta Rika ak Nikaragwa epi fè viktwa pou kontabilize 6 pwen adisyone sou 5 pwen li genyen an k ap ba li 11 pwen, pandan desten l pou li kalifye pa depann de li menm ankò men li depann de Ondiras ak Kostarika, si li vle reve ale nan Koup dimonn 2026 la.
N ap raple, premye nan chak gwoup yo ap kalifye dirèkteman pou Mondyal 2026 la. De (2) meyè dezyèm yo prale nan baraj.
Ayiti nan gwoup C akonpanye Kostarika, Ondiras ak Nikaragwa. Gwoup B : Jamayik, Kiraso, Trinidad & Tobago, Bèmid. Gwoup A : Panama, El Salvador, Gwatemala, Sirinam.
Malgre seleksyonè nasyonal Ayiti a, Sébastien Migné melanje eksperyans ak frechè pou bati yon ekip konpetitif ak detèmine, ou kapab konstate sa pako vrèman mache jan pou li mache a. Jwè ayisyen yo dwe rete konsantre epi kapitalize sou pwen fò yo pandan yo ap korije èrè ak lakin yo pou espere dekwoche yon biyè pou Mondyal 2026 la.
Grenadye yo dwe konnen se dènye liy dwat eliminatwa yo y ap dispite avèk 6 match desizif. Nan faz sa a, chak pwen konte, seleksyon nasyonal la dwe montre anpil volonte pou kapab pi tranchan ofansivman epi mete plis rigè defansivman.
Ayiti angaje l pou dispite faz final eliminatwa Concacaf ki ap mennen nan Koupdimonn 2026 la. Grenadye yo dwe goumen pou fè 6 pwen ki rete yo kont Kosta Rika ak Nikaragwa, pandan l ap priye pou Ondiras ak Kostarika fè fo pa, sa ki ap ba yo chans pou kalifye pou Mondyal 2026 la. De (2) afich ki rete yo kapab bay ton sou anbisyon ayisyen yo nan faz final sa pou reve yon kalifikasyon istorik pou Koupdimonn 2026 la. Ayiti nan batay. Grenadye alaso !
Jacky Médé Fontaine, Centre à la UNE