Direksyon Nasyonal Dlo Potab ak Asenisman (DINEPA), ansanm ak Biwo Rejyonal Dlo Potab ak Asenisman (OREPA Nord), mete ofisyèlman an sèvis vandredi 4 septanm nan nouvo Sistèm Adiksyon Dlo Potab (SAEP) Vallières la, nan depatman Nòdès la.Travay konstriksyon enfrastrikti idwolik sa a te kòmanse depi 21 janvye 2026, nan kad pwojè akonpayman OREPA yo pou reyalize aktivite nan zòn riral ak zòn peri-iben yo, sitou nan pwogram PAP 3 ak Gran Nò.
Pwojè a jwenn finansman nan men Bank Entèameriken pou Devlopman (BID), atravè yon finansman yo akòde Leta ayisyen pou DINEPA. Travay yo fèt tou nan kad yon kontra DINEPA te siyen ak UNICEF.
Mete SAEP la an sèvis antre nan liy ak oryantasyon Direksyon Jeneral DINEPA a pou devlope sektè Dlo Potab ak Asenisman (EPA), ki reprezante youn nan twa gwo aks priyorite estrateji enstitisyonèl la.
Plizyè pèsonalite te patisipe nan seremoni an
Seremoni an te rasanble plizyè responsab ak reprezantan sektè piblik ansanm ak manm kominote a. Pami yo te gen Direktè Jeneral DINEPA a, Enjenyè Théophil Ostinvil; Direktè Rejyonal OREPA Nò a, Enjenyè Pierre Bernardin Poisson; Vis-Delege awondisman Vallières a, Jodanier Charles; Majistra Vallières la, Castel Latortue; ansanm ak Reveran Pè Lumanèce Pierre, Kire pawas Saint-Vincent la. Reprezantan administrasyon piblik nan depatman Nòdès la ak yon gwo kantite moun ki soti nan diferan seksyon kominal Vallières te patisipe tou nan aktivite a.
Gwo patisipasyon popilasyon an montre enpòtans kominote yo bay nouvo enfrastrikti sa a, sitou nan yon kontèks kote aksè ak dlo potab rete yon gwo defi pou anpil moun nan zòn riral yo.
DINEPA vle kontinye entèvansyon yo nan zòn riral yo
Pou DINEPA, mete SAEP Vallières la an sèvis reprezante yon etap nan aplikasyon politik piblik gouvènman an nan sektè dlo potab ak asenisman. Enstitisyon an, avèk sipò patnè teknik ak finansye li yo, vle kontinye elaji aksè popilasyon an ak sèvis dlo potab, asenisman ak ijyèn nan zòn riral ak peri-iben atravè peyi a.
Inisyativ sa yo antre tou nan efò gouvènman an, sou direksyon Premye Minis Alix Didier Fils-Aimé, pou amelyore kondisyon lavi popilasyon ki pi vilnerab yo.