Yon foul moun, anba lidèchip plizyè estrikti politik, manifeste nan vil Ench Chèf lye Depatman Sant vandredi 9 sektanm 2022 a pou mande Premye Minis Ariel Henry kite pouvwa a.
Yon manifestasyon ki te dewoule anba chapo Tab Opozisyon Sant (TOS) ki regroupe yon 20tèn òganizasyon sosyo-politik pou nou site : AAA, Lavalas, Pitit Desalines, OPL, Kontra pèp la, PENN, Matris Liberasyon, MPP, UNOH, Sitwayen Angaje, LIDÈP, CNEH, MJH… ansanm estrik sa yo te fè tèt kole pou manifeste nan vil Ench. Yon manifestasyon ki te kòmanse nan midi anba sekirite lapolis e ki ta pral pran fen vè 2 zè nan aprè midi.
Manifestan yo pakouri plizyè ri nan vil la, boule kawotchou, bloke wout epi mande demisyon Premye Minis Ariel.
Plizyè kote nan vil la, moun yo rache adoken yo fè barikad ak yo, itilize tout sa yo jwenn sou pasaj yo pou fè barigad, kawotchou t ap boule, wòch ak kout boutèy t ap tire depi byen bonè nan maten.
Yon lòt kote, kèk sitwayen nan vil la kritike group moun ki te dekole adoken yo pou fè barigad. Yo fè konnen nou pa ka detwi sa ki fin konstwi.
Manifestasyon sila a te dewoule san gwo ensidan. Se 2èm jounen manifestasyon ki fèt nan Ench pou mande PM Ariel lage pye l.
Napoléon Jacquelin, Centre à la UNE
