Polis Nasyonal Ayiti arete Joël Khawly ki se PDG KHAMACO SA. Lapolis fè arestasyon sila nan sware vandredi 25 novanm 2022 a nan Lamandou Jakmèl depatman Sidès.
Selon jounalis Joanel Fraçois ki travay pou radyo Hosanna nan Jakmel, pandan operasyon sila fòs lòd yo sezi plizyè zam gwo kalib. Lapolis te debake dirèkteman lakay PDG Joël, fouye kay li ki nan Lamandou (Jakmèl) nan kad operasyon sila epi tou pwofite metel anba kòd.
Selon yon sous pròch jounal Centre a la UNE, operasyon sila te genyen plizyè inite nan polis la ladanl e fòs lòd yo ta sispèk antreprenè a ta nan aktivite dwòg. Fouy la vin fèt aprè BLTS kise Brigad k ap Lite Kont Trafik Stipefyan te fin genyen enfòmasyon de yon bato ki ta genyen pwodui ki sanble dwòg te vin kochte kò li nan Marigo selon sa jij depè Fritz Palanquet ki te fè konsta a esplike ak nouvelis. Nan fouy la yo jwenn yon zam T-65 ak yon Uzi.
Plizyè temwen ki nan aviwonman kay PDG Joël la rapòte yo te tande bri anpil kout bal nan moman operasyon sila.
Antreprenè a deja nan Gadavi pou tann Direksyon Santral Polis Jidisyè (DCPJ).
Joël Khawly se pitit ansyen Majistra Jakmèl la, defen Jacques Khawly. Li se youn nan moun ki fè pati klas boujwa a nan peyi Ayiti. Li se yon antreprenè ki enpòte siman pou tout grand sid, li nan vann gaz tou nan sid la epi li trè prezan nan politik Sid la.