Mawoken yo fè listwa nan koup di mond peyi Kata a
Aprè seleksyon Mawòkèn nan fin bat seleksyon Pòtigèz la 1-0 samdi 10 desanm 2022 a nan peyi Kata, li vini 1ye seleksyon nan tout kontinan Afriken an ki rive pou 1ye fwa nan yon 1/2 final nan koup di mond. Mawoken yo pral toke kòn yo swa ak Anglè osnon Fransè yo mèkredi 14 desanm nan.
Pou rive kalifye nan 1/2 final yo nan mondyal Kata 2022 a, seleksyon Mawokèn nan genyen yon trè bèl pakou : li fè match nil ak Kroasi 0-0, li bat Bèljik 2-0, li bat Kanada 2-1, li fè match nil ak Lespay li ta pral bat 3-0 nan faz tirobi. E, samdi 10 desanm nan, Mawòk elimine Pòtigal Cristiano Ronaldo a 1-0.
N ap note, se pou premye fwa nan listwa seleksyon Mawokèn nan li rive atenn degre sila nan yon koup di mond. Egalman, viktwa sa a pèmèt kontinan Afriken an reprezante pou premye fwa nan 1/2 yon faz final koup di mond.
Pou kounye a, Mawoken yo poze tèt frèt ap tann kalifye an Angletè yo oubyen seleksyon fransèz la, pou jwe dènye faz k ap kondui li tou dwat nan gran final la mondyal sila.
Anpil Ayisyen k ap swiv pakou seleksyon Mawokèn nan de prè nan kad diferan pèfòmans li yo, pa sispann rete konfyan genyen posiblite pou Mawòk ta ranpòte twofe mondyal 2022 a nan peyi Kata, depi yo ta kontinye rete sou menm liy yo ye a.
Sérondier LOUISIA, Centre à la UNE