Aprè asasina 3 polisye yo nan Komin Petion-Ville ayè dimanch lan, lapolis nasyonal Ayiti anonse lendi 10 Avril 2023 a, nan kad operasyon y ap mennen nan Tomasen, genyen plizyè bandi ki tonbe.
Selon yon nòt sèvis kominikasyon polis nasyonal la pibliye sou kont ofisyèl li, yo fè konnen genyen plizyè bandi ki nan gang Timakak la ki mouri nan boukante kout bal ak fòs lòd yo.
Toujou selon nòt sèvis kominikasyon polis nasyonal la, yo rive sezi plizyè fizi daso nan kad operasyon sa, san pou otan bay ankenn chif.
N ap souliye Pierre Paul Junior Dorcé, Nicolas Robenson, Medèze Fortilien, se non 3 polisye sa yo bandi touye dimanch 9 avril 2023 a, nan Tomasen 48. N ap note tou sòti 10 janvye pou rive 09 avril 2023 a, bandi deja asasinen 18 polisye nan peyi D Ayiti.