Prezidan Brezilyen an, Luis Inacio Lula Da Silva ak sekretè jeneral Nasyonzini an António Guterres, prezante avi pa yo sou sitiyasyon Ayiti a
Prezidan Ameriken an Joe Biden, mande konsèy sekirite Nasyonzini an pou otorize rapid fòs entènasyonal la pou vin ede polis Ayiti a lite kont gang yo. Biden ki te pale madi 18 sektanm 2023 a nan Nasyonzini di pèp Ayisyen pa ka tann ankò. Se menm konsiderasyon an pou prezidan Brezilyen an Luis Inacio Lula Da Silva ak sekretè jeneral Nasyonzini an António Guterres.
Prezidan Biden salye demach dyalòg CARICOM antame ak aktè politik Ayisyen yo. Menm jan an tou li remèsye prezidan peyi Kenya a William Ruto, li menm ki montre volonte li genyen pou pran tèt fòs miltinasyonal la Ayiti.
Sekretè jeneral Nasyonzini an sou bò pa l te pwofite atire atansyon chèf deta yo ki nan asanble sou dosye Ayiti a, kote depi mwa oktòb pase aktyèl premye Minis lan te ekri ONU pou mande ede Ayiti nan koze sekirite. Sekretè Guterres te pwofite kritike yon mond fragmante, lagè ap taye banda, kote Ayiti pa epanye.
Bò kote prezidan Brezilyen an, Luis Inacio Lula Da Silva, ki te louvri diskou reprezantan chak peyi yo, tankou jan tradiksyon an mande sa,
te pale konsènan konfli ame yo an AYITI, sa li te dekri kòm « yon afwon a ak BON SANS nou kòm moun ». Prezidan Lula raple pa gen okenn solisyon k ap dire nan peyo, depi ansanm aktè yo pa mete aksan sou kesyon dyalòg la.
Prezidan Dominiken an limenm fè konnen li apiye ak tout fòs li deklarasyon Joe Biden fè a sou Ayiti, pandan li di li pa genyen problèm pou Nasyonzini jwe wòl entèmedyè pou dyalòg yo ak Ayiti ak kondisyon pou gouvènman Ayisyen kanpe kanal la avan menm pou yo dyaloge.
Premye Minis Ariel Henry ki ap genyen pou li pran laparòl vandredi sou tribin Nasyonzini an nan Nouyòk genyen ak li: Ricard Pierre Minis planifikasyon, Jean Victor Généus Minis zafè etranje sekretè jeneral Minis yo Richard Alix ak Laurent ST Cyr manb Wo Konsèy Tranzisyon an ( HCT).
Sadrax ULYSSE, Centre à la UNE