Rezo entènèt konpayi Digicel Ayiti a tonbe anpàn samdi 14 septanm 2024 la nan tout peyi a. Sa ki lage kliyan ki itilize konpayi sa a nan gwo tèt chaje akoz entèt yo pa ka jwenn pou fonksyone nòmalman.

Daprè Direktè jeneral konpayi a Jean Philippe Brun, se yon kab « Cable Wireless » soumaren (anba lanmè) ki enstale nan zòn ansyen otèl Kaliko a ki koupe, sa ki afekte kliyantèl li a ak tout lòt operatè yo. Mesye Brun fè konnen se pwopriyetè otèl Kaliko a ki pa vle bay aksè pou teknisyen yo repare kab la. Nan sans sa, li mande responsab espas la ba yo pasaj pou pèmèt popilasyon an jwenn yon soulajman.

Yon lòt kote, Reponsab otèl Kaliko yo fè konnen gen yon pwotokòl dakò DIGICEL te siyen ak yo nan dat 30 jiyè 2020 pou itilize propriyete otèl la nan enterè DIJICEL, kote yo te lwe espas la nan men yo. Malerezman konpayi UNIGESTION HOLDING anpil moun konnen sou non DIJICEL refize peye yo lajan ke li dwe yo. Konpayi a dwe Otèl la 2.5 milyon dola poutan li pa vle vèse yon goud selon sa responsab Kaliko yo fè konnen nan yon nòt.

Nan dat 19 Septanm 2023 avoka Otèl Kaliko te adrese yon rekèt ak jij depè Delma a Garry Courette pou te atire atansyon li sou dosye sila.

Anpil moun ki ap viv Ayiti pa sispann alètr CONATEL sou move kalite sèvis y ap jwenn nan men konpayi telefonik yo nan peyi a men malerezman pa janm genyen bon jan suivi ki rive fèt sou dosye sila.

Sadrax ULYSSE, Centre à la UNE.

By Centre à la UNE

Centre à la UNE se yon miltimedya sou entènèt ki te fonde 9 jiyè 2020. Li espesyalize nan bay nouvèl nan lang kreyòl, yon angajman ki reflete vizyon fondatè yo pou fè enfòmasyon pi aksesib pou kominote kreyòlofòn yo. Medya a genyen yon misyon pou enfòme, sansibilize, epi angaje moun sou sijè enpòtan nan sosyete a. Miltimedya sa a prezante atik, analiz, ak editoryal sou diferan domèn tankou dwa moun, politik, ak sosyete. Chak jou, editoryal li yo adrese pwoblèm enpòtan, souvan ak referans ak sitasyon otè ki enspire refleksyon pwofon sou kondisyon jèn Ayisyen yo ak sitiyasyon sosyo-politik Ayiti. Kòm yon medya angaje, li gen yon apwòch edikatif epi li chache ankouraje konsyans ak refleksyon nan mitan lektè li yo. Jounal sa a se tou yon espas pou kreyativite kote li prevwa pou ajoute caricatures k ap ilistre nouvèl oswa evennman k ap pase yo. Centre à la UNE se yon referans pou moun ki vle rete enfòme nan lang yo pi byen konprann. Nouvèl nou yo kredib e verifye ak yon rezo jèn jounalis profesyonèl e konpetan. Ou ka kontakte nou nan: journalcentrealaune@gmail.com e +549 351 262 7841