Depi vandredi 15 sektanm 2023 a, Prezidan Dominiken an, Luis Abinader òdone fèmen tout fontyè ant Ayiti ak Dominikani
San prezans Corventina, seleksyon Nasyonal Ayisyèn nan bò kote medam yo, ap kòmanse faz eliminatwa « Gold Cup » yo jedi 21 sektanm 2023 a, a 8 tè nan aswè. Match sila ap jwe nan estad Olempya Phelix nan Repiblik Dominikèn.
Seleksyon Nasyonal nou yo gen pliske 2 lane depi yo pa resevwa match nan peyi a. Gen plizyè bagay ki koz sa, men kèk :
- ENSEKIRITE : Nou tout konnen trè byen Ayiti sou yon lis wouj depi kèk tan. Nèg ak zam k ap fè lalwa nan peyi a vin fè dirijan yo pa ka bay garanti pou sekirite etranje ki sipoze antre yo (ofisyèl match yo, ekip advès la…)
- MANK ENFRASTRIKTI : Estad Sylvio Cator se sèl teren nou genyen nan moman an ki ka resevwa yon konpetisyon entènasyonal. Gen sipèvizyon ki pou fèt ladan l tou, men pou kounya, li abandone nan kè Pòtoprens lan.
- PWOBLÈM LÒT TEREN YO : Li enposib pou lòt teren nou gen nan peyi a resevwa match pou kounya, paske yo tout mande gwo pase men.
Pelouz yo, limyè yo ak vestyè yo. Anviwònman teren an se yon lòt priyorite tou. Tout “Parc Sportif” sa yo pa ka pase enspeksyon CONCACAF ak FIFA a.
An 2019 pa egzanp, pou rezon sa yo, AS Capoise pa t kapab resevwa match CONCACAF League yo nan vil Okap nan depatman Nò peyi Ayiti.
Nou tout t ap renmen wè Ekip Nasyonal nou yo k ap jwe lakay, men kondisyon yo pa reyini pou kounye a. Jwe nan peyi vwazen, se altènativ ki pi fasil e ki koute mwens lajan. Se domaj, men nou pa gen lòt chwa pou lakay.
Caleb Jephté Pierre