1.34 milya dola Ameriken, se kantite lajan sa a Ayiti ap bezwen pou reponn ak kriz sekiritè a sou 2 lane, selon evalyasyon rapid enpak kriz (RCIA). Se yon evalyasyon ki fèt ant Leta Ayisyen ak bayè de fon yo.
Ayiti ap viv yon reyalite ki depase konpreyansyon: gwoup gang yo ap simen laterè ak zam gwo kalib nan men yo, pandan Polis Nasyonal Ayiti (PNH) ap lite ak mwayen limite. Sa ki pi grav la? Ayiti pa fabrike zam, e menm jan sa yo toujou ap sikile nan tout kwen peyi a. Kote zam sa yo soti? Ki moun k ap voye yo? Kiyès ki responsab?
Zam nan men gang : yon mistè òganize
Malgre Ayiti pa gen okenn faktori ki pwodui zam, gang yo posede gwo zam lagè tankou AK-47, M-16, ak mitrayèt lou. Rapò entènasyonal yo montre wout sa yo fèt sitou nan kontrebann atravè lanmè. Fwontyè yo ouvè, pò yo pa kontwole, epi anpil moun nan sistèm lan, ki ta dwe pwoteje popilasyon an, patisipe nan konplo a. Gen peyi vwazen, espesyalman nan Karayib la ak nan Amerik la, ki sèvi kòm pwen tranzit pou zam sa yo rive nan men gang yo.
Yon polis san mwayen fas ak gang ki byen ekipe
PNH la ap goumen ak zam ki souvan demode, pandan gang yo montre zam yo ak fyète nan videyo sou rezo sosyal yo. Diferans lan fè pè : gang yo gen plis zam, plis minisyon, epi yo menm itilize teknoloji ki depase kapasite polis la. Men, gwo kesyon an rete: Ki moun ki finanse gang yo? Kiyès k ap voye zam sa yo?
Nasyon an nan yon sèk visye vyolans
Rezilta a klè : kidnapin, masak, piyaj ak abi dwa moun. Popilasyon an, san okenn pwoteksyon, ap soufri anba pouvwa gang yo. Fwontyè ouvè yo ak mank kowoperasyon ant Ayiti ak lòt peyi fè zam kontinye rantre fasil, san okenn blokaj. Pandan se tan, fanm, timoun, ak travayè yo se premye viktim sistèm sa a.
Tan pou nou leve kanpe
Solisyon an mande yon aksyon nasyonal ak entènasyonal ansanm. Kominote entènasyonal la dwe kolabore avèk Ayiti pou fèmen tout chanèl k ap voye zam sa yo. Men, sa p ap posib si pa gen volonte nan men moun k ap dirije yo pou yo konbat koripsyon epi renfòse enstitisyon yo.
Batay kont zam ilegal se yon batay pou sove nasyon an. Si otorite yo pa pran responsabilite yo, gang yo ap kontinye deside avni peyi a. Solisyon an pase nan refòm fon, fòmasyon polis la, ak bon jan sipò entènasyonal pou koupe chemen zam sa yo.
Ayiti paka kontinye nan wout sa a. Se tan pou n leve kanpe epi mande jistis!
Jean Launy Avril
Editoryalis – Centre à la Une