Peyi Salvadò manifeste volonte pou ede Ayiti konbat gang yo. 26 janvye 2023 a, VP Félix Ulloa eksprime volonte prezidan Salvador a, Nayib Bukele, ki prè pou li enstale yon biwo an Ayiti, nan sousi pou ede gouvènman Ayisyen an batay kont kriminalite gang yo ki fin ravaje peyi a.

Depi avan menm Ariel Henry moute sou pouvwa a an Ayiti, gang ame yo te toujou la ap twouble lapè pèp Ayisyen an nan plizyè nivo. Men, sou Ariel Henry, sa vin dejene nèt. Se konsa divès sitwayen Ayisyen k ap viv swa an Ayiti oubyen aletranje toujou eksprime yo sou kriz la.

Pou eseye rezoud tout tibilans sa yo, nan dat 6 oktòb 2022 a, aprè yon konsèy minis ki te fèt nan aswè, Ariel Henry di sitiyasyon ensekirite ki Ayiti a depase l, li depase PNH la, ki depase tout otorite nan peyi… Se sa yo prensipalman, pou jistifye rezon oblije genyen yon asistans militè etranje ki antre an Ayiti, li te mande pou yon 11èm entèvansyon entènasyonal fèt an Ayiti.

Depi lè sa a, kominote entèseksyon la ap koupe rache, pou wè kouman yo kapab voye fòs Ariel mande a, nan sousi pou vin mete estabilite ak lapè. Men, jouk jounen jodi a ki se dimanch 30 janvye 2023, fòs la pa ko janm antre AYITI. Anpil moun k ap swiv tout epizòd nan fim sila, pa sispann mande : Kisa k lakòz aprè pliske 3 mwa, èd militè a pa ko janm ka antre ?

San pè, ni wont, ni jèn, Direktè Jeneral polis Ayisyèn nan, Frantz Elbe, pran laprès e mande prese prese pou yon fòs militè foule sòl Ayiti a, pou fin pasifye peyi a. Direktè a fè deklarasyon sa yo 28 desanm 2022.

Kolonèl Himler Rébus, menm jou a, te demanti Direktè Jeneral defakto PNH la. Pou kolonèl la, se paske DG Elbe manke metrize sitiyasyon an ki lakòz li pozisyon l konsa, paske polis Ayisyèn nan kapab rezoud pwoblèm ensekirite a, depi yo jwenn ankadreman nesesè pou sa.

Se sou yon ang parèy, kontrèman ak Ariel Henry, DG defakto PNH la, divès peyi nan entènasyonal la, prezidan peyi Salvadò a, onorab Nayib Bukele, eksprime tout volonte l pou vin tabli yon biwo an Ayiti, ak objektif ede gouvènman Ariel la jere kesyon ensekirite a.

Yon desizyon anpil sitwayen Ayisyen bat bravo lakontantman pou li, puiske pou yo, se pa yon fòs militè etranje k ap kapab ede Ayiti fè fas ak gang yo. Moun sa yo kwè tou, si entènasyonal vle ede Ayiti tout bon vre, li ka toujou voye materyèl nesesè pou PNH la, fè fòmasyon pou yon gwoup pami ajan yo ou byen voye lajan pou otorite Ayisyèn yo mye ame polis Ayiti.

Yo kwè se ak tip ankadreman sa yo, ki pa gen anyen pou wè ak yon entèvansyon militè, Ayiti va delivre tèt li yon fwa pou tout anba gang yo, ki gen mèt yo an Ayiti kou nan menm entènasyonal la, toujou selon sitwayen yo.

Finalman, anpil moun k ap fouye zo nan kalalou, pa sispann poze kesyon sila: Konbyen kriz Nasyonzini ede Ayiti jere deja, nan 10 misyon li voye deja yo ant 1993 e 2023 an Ayiti, ki pa janm pote anyen de konkrè epi dirab pou peyi a, yo pale de: MICIVIH, MINUHA, MANUH, MITNUH, MIPONUH, MICAH, MIF-H, MINUSTAH, MINUJUSTH, BINUH ?

Sérondier LOUISIA, Centre à la UNE.

By Centre à la UNE

Centre à la UNE se yon miltimedya sou entènèt ki te fonde 9 jiyè 2020. Li espesyalize nan bay nouvèl nan lang kreyòl, yon angajman ki reflete vizyon fondatè yo pou fè enfòmasyon pi aksesib pou kominote kreyòlofòn yo. Medya a genyen yon misyon pou enfòme, sansibilize, epi angaje moun sou sijè enpòtan nan sosyete a. Miltimedya sa a prezante atik, analiz, ak editoryal sou diferan domèn tankou dwa moun, politik, ak sosyete. Chak jou, editoryal li yo adrese pwoblèm enpòtan, souvan ak referans ak sitasyon otè ki enspire refleksyon pwofon sou kondisyon jèn Ayisyen yo ak sitiyasyon sosyo-politik Ayiti. Kòm yon medya angaje, li gen yon apwòch edikatif epi li chache ankouraje konsyans ak refleksyon nan mitan lektè li yo. Jounal sa a se tou yon espas pou kreyativite kote li prevwa pou ajoute caricatures k ap ilistre nouvèl oswa evennman k ap pase yo. Centre à la UNE se yon referans pou moun ki vle rete enfòme nan lang yo pi byen konprann. Nouvèl nou yo kredib e verifye ak yon rezo jèn jounalis profesyonèl e konpetan. Ou ka kontakte nou nan: journalcentrealaune@gmail.com e +549 351 262 7841